Zinema Euskaraz eta Filmazpit programetako pelikulekin osatutako katalogoa kontsulta daiteke eta sarean dauden zenbait plataformaren bitartez eta dendetan eskuratu daitezke filmak 

Zineuskadik, euskal ikus-entzunezko sektorea sustatuz eta indartuz, filmak euskaraz ikusi eta eskuratzeko aukera eskaintzen du, zine ekoizpenak zinema aretoetatik igaro ostean jarraipena eman eta bizia gal ez dezaten. Eskuragarri dagoen katalogoko pelikulak DVD formatuan eskura daitezke ohiko banaketa kanalen bitartez, sarean dauden zenbait plataforma eta dendetan, filmen eskubideak dituzten banatzaileen lankidetzei esker. Katalogo horretan, Zinema Euskaraz ataleko eta Filmazpiteko filmak aurkitu daitezke.

Zinema Euskaraz programak herritarren eskura euskal balio zinematografikoak sustatuko dituen, euskararen erabilera komunikazio kultural gisa erabiliko duen, zein aisialdi arloan normalizazioa bultzatuko duen filma sorta jartzea du helburu. Bestalde, Filmazpit egitasmoa, Donostia Kulturak kudeatu eta Zineuskadik finantzatutako euskarazko azpitituludun zinema zabaltzeko programa da, zeinak Donostiako Zinemaldiaren eta Euskadiko Filmategiaren laguntza duen.

Zineuskadin aurkitu daitekeen katalogoan 30 film topa daitezke euskaraz bikoiztuak edo euskarazko azpitituluekin: 22 Zinema Euskaraz atalekoak dira, eta gainontzeko zortziak, Filmazpitekoak. Generoari dagokionez honela sailkatu dira pelikulak: hiru abentura, lau komedia, bat beldurrezkoa, sei drama, hamar animazio eta sei dokumental. Zinema Euskaraz eta Filmazpit programak jakitera eman dutenez, euskaraz ikusi daitezkeen filmen zerrenda handitzen joango da.